Połosprawjomy, pospominomy se ło szczewikach, ło harbołach, ło szkurbołach, ło holcokach, ło sandalach, adidasach, cichobjegach, ło filcokach, ło gumniokach, ło laciach, ło szułach, ło szułach na kronflekach, ło halbkach, ło lakierkach, ło lakszułach, ło sztalkapach, ło sztiflach, arbajtszułach, trepach, papuciach a rubych sztrykowanych sokach do spanio.
Pod naszom slońskom sztszechom, dachym bych pedzioł, poradzi niykiery cosik wsznupać, niykej kupa starych habozi. Wjerza łod staryj hadry bych pedzioł asz po blank stare szkurbouły. Gynał stare sztszewiki, a niy yjno, my ślonzoki mjanujymy je rozmajcie na rozmajte okazyje. Tyn kult sztszewika je typowo ślońskom fobjom, my momy dycko ptoka na tym tle, po bosoku abo na saga my nigdy niy lotali
Tus-z sztszewik to nic inkszego yjno but. Harboł mo za kuzyna szkurbouła, to jednako familijo, łoba som wyciorani, ledwo dychajom, zola śe jesce trocha fest tszimje, nale zdatne yino na plac abo do hlywika, pywnice. Tukej śe nojlepi nadowajom bo zchacharzonie wyglondajom.
Filcok ze gumniokym łobuwali, łoblykali furmony, bambry, gospodorze do ciepanio gnoja abo łobrobjanio morgow, coby śe niy bluknonć we tym marasie, cieprace..
Adidasy, cichobjegi, sportszuły, trampki, wałbrzychy to moja downo marka, a nojlepi bjołe. Łoblykali my je coby śe uszportowjać, na koło, grać we bala, fusbal, polotać se rundki na polach, śportplacu, we tynisa itp. abo coby szykownie na wjecor, a elegancko na śportowo zaszpanować muskloma, figurom przed frelom coby podziwjała jaki symje gryfny karlus, abo se wylyś na śpacyr poleku do parku s pikuśym rundka machnonć.
Sandale łoblyko śe bez lato, prawje na kożdo hica.
Holcoki, trepy, moj onkel, ujek take robjył, zola bouła ze drzewa, a ta kapa ze skory, łoblykali my do futrowanio gadziny – podobne do tych holynderskich yino wjyrch ze skory. Lubjołech je za bajtla łoblykać, łobuwać.
Halbki, lakszułe, lakerki nadowajomśe na niydziela do kościoła, na fajer, geburtstag i inksze balangi, dansingi, imprezy. Bouły grundlich pastowane, pucowane na glanc a poradziuły śe szklić, hoby psu jajca, besto śe niykej tako godało – te szuły szklom śe hoby psu jajca. Tus-z pjes zowdy dbo ło swoje, pra.. isz mom recht?
Szuły śe na wszyjske sztszewiki godało, zaś szuły na kronflekach nosiyły pizi damy, damulki. Ku tymu łoblykały śtrapsy, śtrompfy, rajtuze no i rajcowały karlusow we miniowach. Paradowały babskim wdziynkym.
Lacie, lacki, laćki, papucie, łoblykało śe po chałpje, we antryju stoły i kożdy łoblykoł kej dodom s placu prziszouł, przilos, a jak niy tus-z bouła srogo haja, na sicher w doma. Jo yjno pucuja, pucuja, a wy wszyjsko we rzici mocie, lebry, pjerońske, flyje, śmodrusy. Seblykej drap te szuły bo nachytos po pysku. Joch sam niyma w doma, a niy je waszo niywolnica Izaura.
Sztalkapy, arbajcszuły. To typowe sztszewiki do roboty we firmach, halach, stolarniach, ślosarniach, na bausztelach, majom sztal kapy ze przodku, potymu coby śe niy pokalicyć przi robocie. Niykej poradzi na gyra, cosik ćiyńszkego ślecieć i zrobi karlusowi ała.
Sztifle łoblykali na wander, abo na konia, na motor. Wjoki mjeli sztiflwe, a fto pokombinowoł to je mjoł.
Śtrykowane zoki do spanio. Mi śe spominajom take rube krymowe ze lamy, fest ciciate, zoki moji downyj freli, mjała dziołcha swoj cymerek, izbetka. Jakech u ni nocowoł, łoblykała te pjykne zoki na noc, a yjno jedwabno halka na sia, jerona joch boł we siudmym niebje, joch się radowoł hoby bajtel ze szukolady, boch wjedzioł łona mi bydzie dzisiej fest przoć, a jo ji… i my śe przoli cołko noc. Rano tsza boło dużyj spać, niyporadziył żodyn wartko wstać…
Tus-z dejcie se pozur na utopka, beboka mi śe niy bojcie.. a zowdy sztram s gowom na wjyrch wsztrekowanom stojcie.. pozdrowjom.. howcie mi sie sam zdrowo..
ilustracja do tekstu pochodzi z książki/komiksu zatytułowanego Achim Godej. Ślónsko godka dla Hanysów i Goroli – Joanny Furaglińskiej.