Witom wos przociele naszyj ślonskyj gotki. Momy fajno pogoda, klara szporobliwje łod casu do casu, no ale szykownie śwjyci. Na podzin je prawje stale tako pogoda rozmajto idzie pedzieć, naprowdy „Złoto Jeśyń”. Tuos mje korci na grziby wylyś. Na grziby bjerymy nojlepi stary koszyk, korb ze hynklym, grziby do taśe śe ńy zbjyro, bo zrobi wom śe we taśi maras, grzyby bydom ciaplate. Pamjyntejcie dobry nouź żodyn pitwok, wraście se do pukeltaszy, abo neca selter, brauza abo piwo, na skraju lasa idze śe trocha grzdulnonć abo pauza zrobić. Grziby som rozmajte, kupa zortouw, blaszokow jo ńy zbjyrom, yino grziby co znom na zicher. Żodnego eksperymynta ze znojduchoma, grziboma co ńy znom, ńy robja. Ńy zymnom take numery Bruner. Ttrujoki do haśoka, abo łostowcie je dzike, gadziny je zezerom,. Jednego blaszoka dycko znom na spamjyńć . Paryzol – kania, ze tego śe robi ala kotlety. Tego lubja, poradzićie je znońś prawje wszyndy. Lubja śniołki- podgrzybki. Dowajom dycko suszyś, dobry grzib je trocha pyrtkowaty, twardy, kejbyś go ze spotku po tym szwamiatym łonym pomacouł śinieje, mo bronotno kapa. Ńy za srogi lubi se we cicikowatym mechu, a kańś kole sosny, aji niykej wele smreka kaj klarcia ciutka śwjyci znojś. Kozoki – kozaki. Kozok cerwony ze małućkom kapom, a fest rubawym sztynglym. Kozok śiwy zaś mo kapa hoby dekel łod Krauze, a lichy bo scypjaty sztyngel. Łone śe ńy nadowajom do suszynio. Bagnioce, maśloki – maślaki znoś go poradzis we barzołach, wjelich bagnistych trowach. Sam dej pozur, poradzis śe bluknonć. Lubi mjeć wodnito ciaplato zola. Prawok – prawik po prowdzie wom sam pedzieć rod je zbjyrom, rod je rychtuja, zaworzom, a kupa sńym wynokwjom, podug mje niebo we gymbje. Gryfny aji szykowny idzie pedzieć paradny grzib lubi dymbowe stromy, żyje śniymi we symbjozie. Mo jasno bronotno kapa, zowdy go podziwjom, a śe raduja hoby byjtel kej take paradne egzymplary znojda. Trujokow niy zbjyrom, a betki mi som za kruche i je łostawja stoć, do soronia, dzika aji inkszyj gadziny. Acha sam mi śe spomnioł tyn gizd djosecki szaton – szatan pjeron podobny do prawoka a śniołka, coś kole tego, no ale łot spotku fest cerwonawy, ruby sztyngel kapa bronotno. Pamjyntejcie maszkytniki cego Alois ńy zno – ńy zbjyro. Grziboma śe jus z blank kupa ludzi zagiwćiyło, zatruło, a teroski boroki kwjotki na smyntorzu łod spodku niuchajom. Pra… Ńych wom śe darzi, a janioł na wos zworzo, durch wachuje dycko jodliwymi grzyboma łopsuje. Howcie mi śe zdrowo, a dejcie pozur na śia…
