Bajtle w rzece i waszbek

Witom wos przociele a kamraty naszyj godki, dugoch śe niymeldowoł, zys niy zowdy je cas na szpas, pra, alech teroski wom trocha naszryftoł jakoch za bajtla zgobjył a giździył.– Przestoncie ciekać po tyj rzyce – pado nom blank znerwowano Oma, prawje zopaska poprawjo, holcoki mo na nogach, take trepy dzewjane. Onkel Flakus je zowdy rod dlo kożdego robjouł, ftory je rod łoblykoł, tuos tsza pedzieć dowoł mu we geszynku ajnfach zo. Oma po leku, we zogrudku gracom kartofle, markwjo, kopje.Podo nom – Dyć wyglondocie choby utopki, upyprane mocie grace, fest uśmodrane gymby, kożdy jedyn utunkany, wy djosecke szlafjyrze, zys przestoncie sie szlajać po tyj rzyce a durch marasic. Do pochanio ście zowdy pjyrsi pra..?
– Ja oma – padom. Mi sie zdo, zgobić to jo nojlepi poradza, tus to przeca wjycie pra.
– A dyc przeca wjym, ty zgobić poradzis nojlepi, dejcie se yino gizdy pozuor, hnet juzaś nachytocie, dockejcie, mje sie zdo kej wos mama, upypranych łobocy nachytocie mocka chybow. Wos podug raje drapnie a łostargo na poł. Synek a fto te lachy mo dycki mochać a prać, rynce mom posmogane łod roboty.
– „Frania” – padom Omje.
– Yino Cie sam synek prosza przeston być frechowny a niy pyskuj, niy rajcuj, jo ci dom „Frania” ty gizdzie djosecki, a fto do „Franie” te lachy wrazić poradzi, na sznoura powjyso.
– Dyć wy abo mutra.
– Ja a wy wjela razy byście sie bez tyn dzin przeblykać kcieli. Waszkorb je tych cornych łachow fol?
– Jo yino roz bez dzin – padom
– Toć roz styknie na dziyn, zys przi wos gizdy na proszek, waszpulwer niystyknie tych pijyndzy!
– Mocie recht – Oma. Wjycie byda myni po tyj rzyce ciekoł.
– Weście se dziacka lepi polotejcie po placu.
– Dyć oma.
Jakoś ci przelozłech ze rzycki bez tyn srogi pot na nasz plac, niyboło to ajnfach, we lewyj rynce tszimja ci mos wjedzieć litrowo krauza zakryncono z deklym na wjyrchu, we tyj krauzie dryn mjołech, tszi rybki, kejch ci to jesce dobrze spamjyntoł, ze dwa ślizyki, jednego piskorza, kuzyn chyciył tszi malućke mini rapitouzy, ropuchy. Tus mjeli my ci taki betonowy srogachny podugowaty kancity waszbek, wele szopy stoć, pora metrow łod gruby na wopno,cna karbit, we tyj dziurze sam ujki wopno gasiyli,ca dycki nom padali:
– Icie sam weg łod tego doła, tus to je drap a momynt, kejś ci sie pjerzinie sam kiery zamamlasi a rajn pjeron do gruby wleci i bydzie naprowda amynt. Niyśmjycie bajtle po tych szfelach skokać wkole gruby, dyć ftorymu gjyra ujedzie i bydzie po ptokach, zys dejcie se naprowdy pozuor prosza, coby do gruby niy zaglondać.
My dycko zwożali coby żodyn śnos we ta pjerońsko gruby niy wpod. A wjycie, joch rod zgobjył, zgobnik symje bouł udany, tym karbitym szczylołech ze biksy po farbje, prozno litrowo biksa znodłech we szopje, po farbje ze deklym, drap wzionech biksa, stawjoch jaa na łopach, ich mos wjedzieć brołech papnioka, abo śpicatego sztifta, hachłech, pizlech, klupłech ze szwongym ceglom abo motkym, ich we biksie rukcuk dziura wygrzmociył. Wyszukołech koncek, kawołek karbitu, harkłech na nia, wciepłech wartko do biksy dekel nawjyrch zacis, biksa przidepłech starym szkurbołym, abo starym sztszewikym, sztrajhycla zapolyłech, łodcekolech, az ci sie bez taa dziura kopcić zdało. Podklodom ći sam po leku sztrajchycla, jak ci sam fukło, a gośno dupło. Mje zmała mycka na zole śleciała, joch sie pjeronym zlynkoł, łlobalyłech sie na rzić, palce mom łobolałe. Ta gorko flama ze tyj biksy bez ta dzurka przecisło, a mi we paluchy ciulło. Myślołech ze bolu siw zejsca w galoty. Wszyjcy z doma powyłaziyli na plac kukać, a joch zdonrzył sie gibko do chlywika schować, ani ci sam niydychom. Naskwol udowom isz nic niy widza nic niy słysza. Po pjytnostu minutach luft je rajny. Żodnego na placu niywidać, a josom na placu juzaś szkudza, kombinuja.
Jerona alech sie rozfechtowoł ze tym łosprawunkym. Dyć ło tych rybkach kciolech szryftać
We tym bycym waszbeku zrychtowali my mały stow, ziala ze rzyki przitachali, pora guzoli powklodali, rybki rajń ze krauzy wkludziyli, rapitozy wciepli, pora dni uciecha my mjeli, a potyn Oma nos prziwachowała i kozała nom ta gadzina do rzyki fraj wypuscić, coby jaa dali niy myncyć.
Padała, tus inacyj nom mjetłom nachuśto. My sie Omy dycko suchali. Co Oma pedziała to rzec śwjynto pra..
Pozdrowjom wos, a hofcie sie sam zdrowo , a dejcie śe dycki pozur na utopka i beboka tys.